الحب و العلاقاتاللقاءات الأولى

لو خاطب وعايز ترضي ربنا.. تعمل إيه؟

تمت كتابة هذا مقال لو خاطب وعايز ترضي ربنا.. تعمل إيه؟ بواسطة الشيخ/ يوسف صالحين من خلال موقع شكة دبوس .

بعض النصائح والتوجيهات العامة في الخطوبة

الزيارات

 واجبة، ومهمة، ولا شيء يقوم مقامها، ولا يجب أن تتوقف أو تمنع إلا بعذر قهري مثل السفر. المقابلة والتحادث وجهًا لوجه هو أفضل أنواع التواصل والتفاعل بلا شك، ترى الشخص بحركاته وسكناته ولغة جسده عيانًا بيانًا. يأتي بعدها كلام الهاتف الذي يكون فيه الصوت معبرًا لكنك لا ترى تعبيرات الوجه. ثم يأتي قاتل الأفراح ومقبرة الغزاة، التواصل الكتابي، وهو ميتٌ بلا صوت ولا تعبير ولا شيء، مليء بالتأويل والفهم الخاطيء، وأي تأخير يحدث بلبلة. إلى آخره.

..

نصيحتي الدائمة في التواصل الكتابي

جروب شات عليه محرم من البنت. إيه يا عم العقد دي ما تفكها؟ يا سيدي بقولك لأنكم أجانب، زيارة البيت أنت بتزورها في وجود محرم، وبنطلب من المحرم – وهو بيعمل كدا لو من نفسه بيفهم – يسيبكم في مكان مفتوح زي الصالة أو الصالون أو أوضة معيشة أو أي حاجة لوحدكم تتكلموا براحتكم والناس داخلة خارجة عليكم فأمنا خطر الفتنة. نفس الكلام، اطلب من المحرم أو هو ذوقيًا يكون موجود في الجروب شات وفي نفس الوقت ميدخلش ولا يتكلم ولا يتفاعل ولا حتى يبص على الكلام، أمال ايه لازمته؟ لازمته احتمالية رؤيته للكلام تجعل الكلام منضبط مفيش حاجة تفلت اكديه أو اكدهوات.

.. لا تنسى زيارة غذاء صحى للمتزوجين لزيادة القدرة

الزيارات كل قد ايه؟

حلو كل أسبوعين، بالكتير كل أسبوع، ولا مانع في المناسبات تستلوح وتروح مرة مرتين في الأسبوع أو لو معدي تتصل تشوف لو ينفع تسلم. أجد نفسي عاجز أمام شكاوى بنات بيقولوا إن الخاطب بيكسل أو مبيحبش يجي، طيب إزاي؟ دا معناه إنه مش مقبل أو فيه شيء غلط في تفكيره أو تصرفاته.

..

الخاطب الزائر

خليك على راحتك إلى حد ما بدون برشطة، يعني ممكن تطول شوية في القعدة بس مش لدرجة إنك تبات. البيات لا ينفع خالص في الخطوبة إلا يعني لو على سفر وهتنام في أوضة رجال أو غير ذلك، لا يستحسن برده إلا لحاجة أو ضرورة. وخليك رويح وكإنك في بيتك نص ونص، راعي حرمة البيت وفي نفس الوقت حسسهم إنك واخد عليهم وواحد منهم وأطلب أكل وشرب وكل حاجة بالمعقول.

القاعدة العامة

إن المرأة مطلوبة لا طالبة، فسعادتك تسعى ليها، وتتقدم، وتطلب إيدها، وتجيبلها شبكة، وتجيبلها هدايا، وأنت اللي تتواصل معاها. استعجال سعادتك في إنها تاخد خطوة وتكلمك ولا تتصل بيك ولا تجيبلك هدايا دا غشم غشم ياربي مشوفتش كدا. حبيبي لو بتفهم يعني في النساء، صنف حياته مليئة بالمخاوف والخوف. أنت محتاج فترة أصلا لا بأس بيها تثبتلها إنك جدير بالثقة وتسليم قلبها ليك والراحة لك والشعور المطمئن تجاهك وحيالك. هي بترتبط وبيعدي قدامها في خيالها شريط فيه كم النساء اللي بتتمرمط وتتضرب وتتهان وتتشتم وتتخان وتترمي وتتساب وبالعيال .. إلخ. فسعادتك إهدى كدا، واصبر، وحط بذور الثقة والاطمئنان والسكينة في نفسها، وأرويها رويدًا رويدًا، ومتطلبش ولا تنتظر منها أي حاجة غير إنها بس تتجاوب معاك سنة أو تقولك شكرا أو تبتسم أو تبقى راضية عنك عموما، آه والله. وإن شاء الله يا بيه لما تتزوجوا، هتحصد والله نتيجة الدلع والصبر اللي صبرته، بس كله في معاده اصبر. وأنت المبادر وأنت عليك المواضيع وكل حاجة. هي بس لو ارتاحتلك وفتحتلك قلبها يبقى كتر ألف خيرها.

..

يمنع تمامًا التصريح بالحب والتلميحات والاستهبال. كله بيبان في التعامل والنظر واللهفة للقاء والسعادة عند الاجتماع .. إلخ. كله لوقته برده ومعاده عشان العكّ وحش.

استغلال الخطوبة

استغلال الخطوبة فيما يفيد وفي ما هو غاية الخطوبة. بمعنى كثرة الكلام والنقاشات الفكرية والمستقبلية وتصور الحياة والحياة الزوجية وحتى أدق التفاصيل المادية والمعنوية زي العفش والتشطيب والتربية والتعامل والشغل .. كل دا بيوضح الصورة وكم التناسب والتناغم بينك وبين الشخص، ويا سلام لو تذاكرو برنامج تأهيل زواج ولا حاجة مع بعض وتتناقشوا فيه يبقى زي الفل.

..

الخطوبة مش غاية

بمجرد ما يحصل اطمئنان ومعرفة لن تستطيع تخطيها إلا بالعقد ثم بالزواج وغلق الباب عليكما، فبالتالي لا داعي من الاستمرار في الخطوبة وإنما ننتقل لمرحلة العقد عشان نكون في سعة من أمرنا ونبتعد عن الخوف من الوقوع في المحظور. طبعا الموضوع أحيانا مبيبقاش سهل بسبب الأهل بس الزن والمحاولة مهمين.

..

بدل ما تبعتوا أسئلة على آسك، ممكن تتعودوا من الأول تصارحوا بعض في كل الأمور وتتناقشوا في كل الأمور بأريحية. حتى لو الأمر حساس أو صعب، ممكن يتطرح بشكل هاديء ومحترم بعيدًا عن أي إهانة أو تجريح، التدرب على دا من الخطوبة هيساعدكم في الإكمال في خط المناقشات والحوارات وحتى الجدل الهاديء بعد الزواج.

.. تخيل إنك كاتب في ورقة كدا: الآخر من حقه شرعا وعقلا وعرفا يفسخ الخطوبة لأي سبب أو بدون سبب أو لمجرد إنه نفسيا مش مرتاح بدون ما يكون عنده سبب ملموس، كرمش الورقة وحطها في جيبك (كخيال برده) وخلي المعلومة في دماغك. فهونًا ما على نفسك، اضبط مشاعرك، اضبط الكرم، اضبط تصور الحياة بالخاطب والمخطوبة، متسرحش أوي ومتتعلقش أوي عشان لا قدر الله لو حصل حاصل يبقى الأمر مش صعب أوي. فبالهداوة كدا لحد ما كله يعدي على خير وتقدر تكمل.

اترك تعليقاً

زر الذهاب إلى الأعلى