![الحالة النفسية والعلاقة الزوجية](https://i0.wp.com/shaketdabos.com/wp-content/uploads/2022/03/al7ala-alnfsya-wl3laka-alzwgya.png?resize=780%2C470&ssl=1)
الحالة النفسية والعلاقة الزوجية
في ارتباط وثيق بين الحالة النفسية والعلاقة الزوجية
ربنا جل وعز لما قال ” المال والبنونَ زينة الحياة الدنيا ”
كان بديع للدنيا بخمس كلمات فقط شيء معجز وعجيب..
كل الدنيا دي..
كل مشاكلها..
كل أوجاعها..
كل حاجة بتفرحك فيها..
منقسمة لقسمين
- المال
ابتداءا من سعيك للحصول عليه، ثم مشقة الوصول إليه، ثم إنفاقه ثم ما يلي إنفاقه من فرح أو ترح لو اخترت إنفاقه في غير محله..
- البنون
من أول السرير، مرورا بإن الواد جه، وكبر، وبيطلع ميتيىْك لحد ما تموت
أي مشكلة في الحياة قاطبة منبثقة من الاتنين دول
المال
البنون
والاتنين بيرفلكتوا على بعض وبيؤثرا بالسلب والإيجاب.. قولا واحدا
فلو سمحت متخليش الهمّ يركبك، فتقصَّر في حق زوجتك
سيبها على الله..
عمرك كله بطوله ربك أبدا ما خذلك
ولو تسرَّب لنفسك إحساس إنه خذلك في موقف ما، فـ على الحقيقة هو اختار لك الأفضل ولو سابك لاختيارك كنت هتلاقي الخازوق المغري اللي مش هتستحمل تبعاته إن عاجلا أو آجلا.. فـ صدقني هو أحكم منك وأعلم بالخفايا عنك وبيحوش عنك كل وحش.. فـ سلم أمرك ليه ومتقلقش.. هو المدبر وبيده خزائن الأرض ولا تغيضه النفقة، ولا يعسُر عليه رزقك.. وخليك حَسن الظن بيه فإنه والله الذي لا إله غيره ” عند حسن ظنك به ”
خليك دايما فاكر إنك سجين احتياجاتك
يعني لو عايز تركب BM X6 فـ انت مسجون في الاحتياج ده، ولما بتنفذه بتبقى مسجون في تبعاته، بتفضل في ساقية علشان تُلبي الاحتياج، وبعدين تدخل في ساقية تانيه علشان تُلبي تبعات الاحتياج..
فمتسجنش نفسك في احتياج وهمي
الحياة بتتعاش بأبسط البسيط
الحياة مش هتقف على الموبايل أبو كام وعشرين ألف ولا على العربيه امو ربع ولا نص مليون، الجوازه كمان اللي انت مقبل عليها مش صح انك تبقى مربوط في الساقية زي الـ… كده، اتجوز بالبسيط الضروري وبلاش بهرجة.
قلل نفقاتك بقدر الاستطاعة
اعمل الضروريات بس
اهدى واطمن .. ربنا دايما بيختار الخير
وخلي نصب عينيك دوما قول النبي صلى الله عليه وسلم ” من أصبح آمنا في سربه معافى في بدنه عنده قوت يومه فقد حيزت له الدنيا بحذافيرها ”
خدت بالك من الكلمة
عنده قوت يومه
يعني أكل النهارده
مقالش أكل الشهر وشقة ٣ مطارح وعفشة ميه وفراندا بحري، وعربية موديل السنة وموبايل من ابو خمسين كاميرا وحساب في البنك ومأمن السنتين اللي جايين ومشروع بيجيب فلوس…
لا هو اختصر الليلة دي كلها بإن يكون عندك اكل النهارده
آهو ده معاه الدنيا بحالها كما قال حبيبي صلى الله عليه وسلم ” فقد حيزت له الدنيا بحذافيرها ”
وأخيرا
وخذها من مُجرب
تصَدق بمالك، دور على الفقير اللي محتاج في شارعك، ولا يسأل الناس إلحافا، وأنفق عليه من غير ما تجرحه، هات حبوب ” فول – رز – مكرونه – فاصوليا ناشفة – لوبيا – عدس ” وخلي مراتك تودي لمراته شنطة حلوة كده فيها زيت وكيسين لحم أو فراخ ومعاها الحبوب دي، بكل أدب كده حتى لو هتقول لها دي حاجات جاتلنا من عند ربنا فأخذت لنفسي كيس وجبت لك كيس .. واهو الجيران لبعضها
ما أخرجته لله هو الباقي
وما أنفقته لنفسك هو الفاني
ربنا يرزقكم رزقا حلالا طيبا، ويجعلكم سعداء مع أهل بيتكم يارب
لمتابعة المزيد اليكم موقع شكة دبوس