ما هي أفضل الأوقات لتناول الوجبات؟
ما هي أفضل الأوقات لتناول الوجبات؟ هو مقال لطيف خفيف عن ناكل امتى فيجب عليك قراءته جيدا .
تناول الإفطار كالملوك، والغداء كالأمراء، والعشاء كالفقراء.
الوقت المناسب للفطار
اللي انت ممكن تكبر دماغك عنها اعتقادًا إنك كده عاش أوي وبتخسس، وبعدين تيجي ترمرم عا الغدا وتقول ما هو الجسم مخادش فطار، هو فعلا مخادش .
- وجبة الإفطار عندنا دراسات كتير بتُثبت أهميتها، وإن اللي بيعتاد عليها بعد استيقاظه بنص ساعة يتمتع بصحة أفضل ولا يتعرض للسمنة مثل الذين لا يعتادونها، وكانت Deutsche Welle إذاعة ألمانية نشرت تقريرا يفيد بهذا الكلام اللي انت قرأته داهوَّن.
- وجبة الإفطار بتعزز عملية الاستقلاب الغذائي Metabolism المشهورة بـ {الأيض} أخي الكريم الأيض مش البيض الله يكرمك، وده بيدي الجسم الطاقة اللازمة؛ علشان تفهم كويس ربنا خلق جسمنا غاية في العبقرية، عملية الأيض دي بتهدم المواد الغذائية وتحولها لطاقة، وكإن جسمك بيمضي حضور وانصراف في ميكانيكية عمليات الأيض باقي اليوم، يعني الصبح لما جسمك بيحوًّل الغذاء لطاقة، بيعرف إن كل شيء تمام وبيبقى عنده المقدرة ببساطة طول اليوم إنه يتمم التمثيل الغذائي.
- كمان الدراسات قالت إنك لما تتنازل عن وجبة الفطار من 4 لـ 5 مرات في الأسبوع الواحد ده بيرفع نسبة احتمالية الإصابة بالسكري Type2 لـ 55٪ عن اللي بيفطروا.
- في كمان ارتباط وثيق بين انخفاض مستوى الجلوكوز في الدم وإن مزاجك ميبقاش رايق، وجبة الإفطار الصبح بتحافظ على عدم انخفاض مستوى الجلوكوز، وبالتالي فـ الفطار بيخليك أروق.
- وجبة الفطار بتخلي نشاط الأمعاء سليم.
- طبعا أفضل وقت لوجبة الإفطار هو بعد الاستيقاظ بنصف ساعة، على ما تخلص الواحد بتاع الصبح وتاخدلك الشاور الجميل يكون اتجهز لفخامتك طبق السلطة .
الوقت المناسب للغداء
احنا بنميكن الأكل، خلاص بقى خلينا جسمنا يفيد تماما من الإفطار، بعد 4 ساعات من الإفطار يعني على الساعة 12 الظهر كده بيبدأ الجسم عايز ياخد غذاء تاني علشان يكمل التمثيل الغذائي
- يستحسن طبعا إن الغداء يبقى سخن.
- يستحسن تتاكل بهدوء بدون صربعة.
- هي مهمة جدا لاستكمال التمثيل الغذائي ولمد الجسم بالطاقة اللازمة لاستكمال اليوم، كمان بتضبط الحالة المزاجية جدا علشان بيبدأ الجلوكوز يتراجع، والوجبة دي بتعوض التراجع ده.
الوقت المناسب للعشاء
أفضل وقت ليها من الساعة 6 لـ 6:30 .
- وجبة العشاء مينفعش تتأخر للساعة 8 بالليل، وطبعا قلة أدب إنك تتناولها الساعة 1 وآخر وىىىاخة إنك تفضل رايح جاي عا التلاجة والبيت كله نايم يا لص.
- جسمك بالليل ميقدرش يهضم الطعام بنفس جودة الصبح، وده يراكم دهون على الخصر ويخفي عمك عزت، وهيصدق عليك قول الشاعر {عنيا عليك بتبص يا حبيبي ومش شايفاك}
- آخرك تاكل قبل النوم بـ 3 ساعات.
- متحاولش كمان تتخطى وجبة العشاء علشان نفضل محافظين على الميكنة، لإن الدراسات اللي نُشرت في مجلة Journal Nutrients عام 2021 أثبتت إن اللي سابوا وجبة العشاء على أمل يخسوا، وزنهم زاد أكثر من اللي التزموا بيها.
- بلاش دهون ضارة، وبلاش زيوت مهدرجة، وبلاش وجبات معلبة بمواد حافظة، وبلاش سكريات، كل ده وتحديدا في وجبة العشاء ممكن يعمل تخمر داخل المعدة وانتفاخ.
- خلي العشاء يكون فيه: شعير – شوفان – عدس – فول – فاصوليا – ترمس – أو رز بنى – والمكسرات والسمسم وصدور الدجاج والموز، زبادي، فاكهة، خضار فريش، تونة أو سالمون، ولو هتشرب كوباية حاجة سخنة خليها كراوية أو ينسون أو نعناع متحلي بالعسل، وراجع الجزء الأول من سلسلة ناكوليه فيها شوية حاجات عنب.
الخلاصة
جسمك بالمعنى الحرفي عبارة عن ماكينة.. مَيكِنُه بقى علشان تبقى متميكن ومتمكن، وكل ما حافظت على غذاء صحي في وقت منضبط وفقا للدراسات فـ انت بتخلي الماكينة دي تشتغل على كل الأصعدة بطريقة ممتازة.. وافهم انت بقى.
