غسل الجنابة في الاسلام من أهم المقالات التي يحتاج قرأتها الزوجين المقبلَين على الزواج لانه يساعد بشكل سليم الطهارة لاقامة فرائض الدين الاسلامي من خلال موقع شكة دبوس بعد مراجعة اخر ما توصل اليه العلم لكي نأتيك بالمعلومات الصحية والمفيدة عن غسل الجنابة
متي يجب غسل الجنابة ؟
السبب الأول: لما ينزل منك {سواء كنت رجل أو أنثى} السائل المنوي، سواء كان في حلم {احتلام} أو باليد {استمناء} أو أي وسائل أخرى أو حتى نزوله بدون أي وسائل تحت أي ظرف.
السبب الثاني: لما يحصل دخول لجزء من العضو الذكري في القُبل أو الدُبر يعني دخول مقدمة العضو الذكري بس يوجب الغسل.
غسل الجنابة في الاسلام
دينا الحنيف سمى الحالة دي {الحدث الأكبر} ومينفعش نصلي ولا نقرأ قرآن واحنا على جنابة إلا لما نغتسل.
طيب هو أنا ينفع أنام ولما أقوم من النوم أبقى أغتسل
ينفع طبعا، لكن امتثل ساعتها لحَض النبيﷺ إنك تتوضى بعد الجِماع لو ناوي تؤخر الغسل.
طيب هو الوضوء ده ينفع أصلي بيه
لا طبعا، ولا ينفع تعمل بيه أي حاجة غير انك حبيت تقلد النبيﷺ
طيب لو أنا داعبت العضو الأنثوي من بره وأنا نزلت وهي لا، هل وجب على زوجتي الاغتسال
لا .. طالما محصلش التقاء داخلي، يبقى مفيش عليها اغتسال، لكن انت علشان نزل منك السائل يبقى عليك اغتسال.
غسل الجنابة للمرأة المتزوجة
- الحيض.
- النفاس.
- إذا نزل عليها السائل سواء في النوم أو اليقظة، باستمناء، أو مداعبة وخلافه.
- إذا حصل إدخال للحشفة داخل العضو الأنثوي أو الدبر ” وطبعا وطء الدبر حرام وكبيرة من الكبائر ولا يجوز للزوجة أن تطيع زوجها فيه إذا سألها إياه ” لكن احنا بنذكره في معرض الرد على موجبات الغسل.
هل يصح زوجتي تمسح شعرها متغسلوش في الاغتسال علشان عملاه بروتين ؟
لازم نغسل الشعر ونوصَّل الماء لمنابتِهِ، ونخلل فروة الرأس بالأصابع، وحضراتكم لو مسحتم بس لا يجزيء ذلك في الغسل، إلا إذا كان لعِلَّة، يعني مرض أو مشقة أو شيء شديد يعلم الله أنه يصعب معه غسل الشعر، ساعتها المسح على الشعر يجزيء.
طيب ينفع أنام وأنا جُنُب من غير ما اغتسل وبكره هاصحى صايم
أيوه ينفع وصيامك صحيح سواء كان فريضة أو نفلا، لإن الاغتسال من الجنابة ليس شرطا في صحة الصيام.
طيب لو شوفت حلم، وقمت من النوم ملقيتش أي سائل نزل مني
ليس عليك غسل.
طيب لو لقيت سائل منوي ومش فاكر أصلا أي حلم
وجب عليك الغسل .. ما احنا قايلين فوق بقى متتعبنيش معاك، قلنا طالما نزل سائل منوي يبقى وجب الغسل.
ينفع أدخل المسجد وأنا جُنُب
لا.
طيب لو نمت في المسجد بقى وقمت من النوم لقيت نفسي على جنابة
لا يجوز لك أن تمكث في المسجد، يا تدخل تغتسل حال اكتشافك، يا تخرج من المسجد.
أسهل طريقة لغسل الجنابة
النية + تعميم الجسد بالماء = تم الغسل.
غسل الجنابة لسيدنا النبيﷺ.
- نغسل الايدين الأول
- نغسل العم عزت بالايد الشمال
- تتوضأ الوضوء الكامل، وممكن تسيب الرجلين بس لآخر الغسل.
- تنعكش شعرك كده وتدخل الميه في كل حته فيه
- تغسل نص جسمك اليمين
- تغسل نص جسمك الشمال.
- لو مكنتش غسلت رجلك في الوضوء اللي فوق ده تغسلها دلوقتي.
طيب هو أنا لو ضربت غطس في البحر يا مولانا ونويت الاغتسال، ينفع
طيب في فرق بين غسل الجنابة وغسل الحيض أو النفاس
لا مفيش فرق، إلا أنه يستحب لها أن تتطيب موضع الدم في اغتسال الحيضة والنَفَسة، وتُدلك شعرها أشد من تدليكها إياه في غسل الجنابة.
طيب غُسل يوم الجمعة، وهل ينفع اغتسل للجنابة والجمعة مع بعض
غسل يوم الجمعة سُنة وليس واجب زي غسل الجنابة، يعني لو تركت غسل الجمعة مفيش مشكلة، وطريقة الاغتسال ليوم الجمعة زي اغتسالك للجنابة بالضبط مفيش اختلاف، وينفع تبقى بتغتسل للجنابة وتنوي انها للجمعة كمان.
طيب أنا لو اغتسلت بقى كده محتاج اتوضى ولا خلاص
لو اغتسلت مش محتاج تتوضأ.. الغسل يجزئ عن الوضوء، بس خد بالك الغسل الواجب هو اللي يجزئ، يعني متبقاش تحت الدش وانت اصلا مش على جنابة، وتقول أما انوي الغسل واعمم جسمي بالمياه وابقى كده اتوضيت.
طيب لو لمست العضو الذكري هل ده محتاج اتوضى بعده
أيوه محتاج تتوضأ .. هتشغل دماغك عليا دلوقتي وتقول لي طيب ما انا كده بلمسه وأنا بغتسل، يبقى كده الغسل مش بيجزئ عن الوضوء .. شغلت الفهامة خلاص ممكن تغتسل وتلمس العضو، وبعد ما تخلص الاغتسال كله تتوضأ، وممكن تؤخر الوضوء اللي في الاغتسال نفسه للآخر.. وطبعا في علماء ذهبوا لأنه ليس على لامس عضوه من وضوء طالما لم يكن ذلك بشهوة.. بس احنا بناخد بالأحوط.
طيب معلش لو راجل جامع حيوان، أو جامع راجل تاني
طبعا نعوذ بالله من ذلك، نسأل الله السلامة والعافية لنا ولأبنائنا وأهلينا ومن حوالينا والمسلمين والناس أجمعين، وطبعا يوجب ذلك الغسل، ومحدش يقول لي بتذكر الحكم ليه هو في حد يعمل كده وهيبقى مهتم يعرف دينه والاغتسال.. آه في، وده حكم شرعي وبنذكره في محل ذكره كحكم شرعي.
