مشاكل العلاقات

أضرار الجماع أثناء الدورة الشهرية

أضرار الجماع أثناء الدورة الشهرية  من أهم المقالات التي تجمع بين الجانب الطبي والجانب الديني فعليك قراءة المقال بالكامل.

كنت راجع من السفر ومتشوق لمراتي جدا وكانت في فترة الحيض وجامعتها أعمل إيه وهل في ضرر؟

موقع شكة دبوس هيقولك تعمل ايه

جماعك امرأتك في حيضتها أو نَفَسِها بإرادتها وإرادتك حرام، وهو ذنب كبير، وأنت وهي تأثمان.

طيب كده آخر الدنيا يعني؟ لا طبعا

1- نتوب لله سبحانه وتعالى

2- نندم على فعلتنا

3- نعزم ألا نعود إلى ذلك أبدا

4- نتصدق بدينار أو نصف دينار.

الدينار = 4,25 جرام ذهب عيار 24 والنصف دينار = 2 جرام ذهب.

وهتعمل كده امتثالا لأمر النبيﷺ عندما سُئل أن رجلا أتى امرأته في حيضتها فقالﷺ {يتصدق بدينار أو بنصف دينار}

أما عن سؤالك عن الضرر الذي قد يقع عليكما، فـ انت لازم تعرف إن الجماع وقت الدورة الشهرية فيه ضرر على الأنثى من ناحية وعليك كمان من ناحية.

لا تنسى زيارة غذاء صحى للمتزوجين لزيادة القدرة

أضرار الجماع أثناء الدورة الشهرية علي الأنثي

من حكمة ربنا سبحانه وتعالى إن في بكتريا نافعة متواجدة على طول في المهبل اسمها عصويات دودرلين، دي شغلانتها سيكيورتي – فرد أمن.. أي جراثيم تضر بالمهبل هي اللي بتحارب، ومن حكمة ربنا إن العصويات دي بتموت في وقت الدورة علشان المهبل بيتغير من الحامضية للقلوية، وده بيدي مساحة عبقرية لتجديد الجيش المقاتل اللي بيستقبل أي جراثيم معديه ويطلع عين اللي خلفوها ويحافظ على المهبل، طيب الجيش ده أصلا بيشتغل ازاي؟ عنده تكنيك لطيف أوي، هو بيحول السكر يا باشا لحمض لبنيك، والأخير ده بيقوم بالواجب كله.. طيب لما الجيش ده ميبقاش موجود؟ وانت داخل بعمك عزت ومعاك كل جراثيم الكوكب من بره المهبل.. أكيد بتبقى فرصة إن يحصل ضرر مش صغيرة.

عندك تركاية تانية مزعجة.. النسيج اللي بيبطن جدار عنق الرحم، بيبقى ضعيف جدا جدا وقت البريود، ضعيف ومعرض للجروح والنُدب، طيب لما يتجرح إيه ممكن يحصل؟ حاجة في غاية السخف، إن حيوان منوي خلبوص يخترق الجدار الهش ده ويدخل يغير في خواص الـ DNA الحمض النووي في الخلايا، وده بيخلي احتمالية حدوث سرطان مش قليلة.

كمان لما الحيوان المنوي بيعرف يدخل للدم عندها، الجهاز المناعي بيكوِّن أجساد مضادة ليه، بيجهز له جيش خاص بالمعنى الحرفي، نفس فكرة اللقاح كده.. اللي هو يلا نديك لقاح علشان جسمك يحفظه ويتعامل معاه ويكوِّن له جيشه بحيث لو أصابك هذا الفيروس في يوم من الأيام تلاقي الجسم حافظ وبيعرف يتعامل مش بيسحلك، لكن الأزمة هنا إن جهازها المناعي بقى يتعامل مع حيوانات معاليك على إنها أعداء، ومجهز لها جيش مقاتل.. وده بيسبب إجهاض وعدم حدوث حمل من الأساس في المستقبل.

عندك حاجة غاية في الرخامة  تاني الأوعية الدموية اللي بتغذي الرحم بتكون متمددة في الوقت ده، وسيادتك داخل طالع بعزت ومبسوط أوي، ومع كل دخول وخروج بتسرسب شوية هواء، الهواء ده عنده مقدرة إنه يسد الأوعية الدموية، تقوم تؤثر على المخ أو الرئة، تقوم البنت يغمى عليها، وفي حالات مُسجلة طبيا إنها تُوُفــيت بهذه المشكلة.

أضرار الجماع أثناء الدورة الشهرية علي الرجل

وارد جدا إن الجراثيم المعدية تنتقل للقضيب، وده بيعمل التهابات، مشكلة الالتهابات دي انها بـتمتد للقناة البولية، وممكن جدا تهاجم غدة كوبر والبروستاتا وحتى الحويصلتين المنويتين، وربما الخصيتين والبربخ كمان.

خُفت؟

طيب تعال اطمنك، إن شاء الله ده صعب يحصل من مرة واحدة، وربنا أكرم من أن يعاقبك بذنب المرَّة، لكن خذ بالك {يريد الله بكم اليسر ولا يريد بكم العُسر} والله لا يظلم الناس شيئا ولكن الناس أنفسهم يظلمون، استغفر، وتب، وارجع، وتصدَّق أنت وزوجك، واستبشر بالله خيرا.

واشرب مياه كتير انت وهي وفرغوا المثانة أول بأول، علشان نطهر مجرى البول.

▪في حد إور هيقول طيب ينفع نستخدم كاندوم أثناء الحيض، وبكده نقلل الأضرار اللي انت قايل عليها فوق دي.

صحيح الأضرار هتقل فعلا، لكن لن تنعدم، واحنا مش بنقيس شرائع ربنا على الضرر من عدمه، ربنا قال منعملش يبقى منعملش.. وانتهت وخلصت.

{قل هو أذى فاعتزلوا النساء في المحيض ولا تقربوهن حتى يطهرن}

▪سألت مراتي الدورة خلصت ولا لا، قالت خلصت، نمت معاها وبعد ما خلصنا اكتشفت إن في دم نزل وإن الدورة لسه مخلصتش، هل كده علينا شيء وفي حاجة أخاف منها لإني قلقان فعلا

لا شيء عليكما، بل هو رزق الله لكما، وخليها قاعدة في حياتك كده امشي عليها قال الله جل وعز {وليس عليكم جناح فيما أخطأتم به ولكن ما تعمدت قلوبكم}

والفقهاء بيقولوا

إنْ وطِئَها في حيضتها ناسيًا أو جاهلا بأنها حائض، أو حتى جاهلا بحُرمة الوطء في الحيضة، أو مُكرها = فلا إثم عليه ولا كفارة.

ومتخافش من الأذى الطبي.. مش هيحصل حاجة بإذن الله ورحمته.

▪ هل إدخال العضو بين الفخذين من الأعلى بحيث يلامس الشفرتين اثناء الحيض دا حلال ولا حرام ؟

ملامسة القضيب للشفرتين في الحيض غير جائز، لكن تعال أقولك عن المُفاخذة، الموضوع ده فيه تفصيل جميل وممتع.

ربنا ﷻ قال { فاعتزلوا النساء في المحيض } كلمة المحيض دي خالصة الدلالة على حاجتين.. وقت الحيض ومكان الحيض ” الفرج “

بص بقى على فعل النبيﷺ بتحكيه أمنا عائشة رضوان الله عليها

{ كنت أغتسل أنا والنبيﷺ من إناء واحد وكلانا جنب، وكان يأمرني فأتزر فيباشرني وأنا حائض }

يعني إيه ” أتزر” دي؟

يعني تغطي ما بين السرة والرُكبة، يعني بلغة عصرنا تلبس شورت مثلا

طيب يعني كده المفاخذة إن عضوي يكون بين الفخذين من غير ما يلمس الفرج عندها في مشكلة؟

فيه اختلاف

فريق من العلماء يرى بجواز المفاخذة للزوجة وقت حيضتها، إن كنت تملك إربك، بتعرف تمسك نفسك ومش هتقع في المحظور.

فريق عريض من العلماء زي أبو حنيفة، مالك، الأوزاعي، أبو يوسف وغيرهم.. شافوا إنه لا يجوز المباشرة بلا إزار، زي ما سيدنا مالك روى في الموطأ أن رجلاً سأل رسول الله ﷺ: ما يحل لي من امرأتي وهي حائض؟ فقال ﷺ: “لتشد عليها إزارها، ثم شأنَك بأعلاها”.

القول الثالث وما أميل إليه وتستحسنه نفسي.. لو كنتَ تملك نفسك وتعلم أنك لن تقع في الحرام، يبقى هي تغطي موضع الدم ” فوطه وأندروير ” والرجل يداعب ويفاخذ ويفعل ما يحلو له.

اترك تعليقاً

زر الذهاب إلى الأعلى